Дар бозии аввали марҳилаи гурӯҳии Лигаи қаҳрамонҳои AFC-2022, қаҳрамони Тоҷикистон бошгоҳи “Истиқлол”-и шаҳри Душанбе дар гурӯҳи “А” аз тими “Ал Райян”-и Қатар бо ҳисоби 2:3 ноком гардид.
Дидори дастаҳо дар майдони байналмилалии “Кинг Фаҳд”шаҳри Ар-Риёз доир шуд. Ҳисоби бозиро дар дақиқаи 3-юми рақобат Шаҳром Сулаймонов боз намуд. Баъд аз панҷ дақиқаи голзании Шаҳром футболбозони “Ал-Райян” бо як бозигузории олӣ, ҳисобро баробар намуданд. Пеш аз танафуси қисми аввал дар дақиқаи 44-ум Йохан Боли тавонист голзанӣ намуда, ҳисоби бозиро 1:2 намояд.
Легионари ӯзбекистонӣ Муҳаммад Исаев дар дақиқаи 66-уми рақобат ҳисоби бозиро 2:2 намуд, лекин дар дақиқаи 71-ум Йохан Боли голи ғалабаовари “Ал-Райан”-ро ба самар расонида, ҳисоби бозиро 2:3 намуд.
Дар даври дуюми марҳилаи гурӯҳии Лигаи қаҳрамонҳои AFC-2022 қаҳрамони Тоҷикистон “Истиқлол” рӯзи 11 апрел бо бошгоҳи “Шарҷа” (АМА) бозӣ мекунад.
Сорбон Амонуллозода,
Радиои “Тоҷикистон”