Вазорати корҳои дохилӣ аз кушта шудани 3 нафар дар садамаҳои нақлиётӣ хабар додааст. Ин ниҳод мегӯяд, сабабҳои фалокат ноуҳдабароии ронандагони воситаи нақлиёт буда, қонуншиканӣ дар масъалаи риояи ҳаракати роҳ боиси марги мусофирон гаштааст.
Ба навиштаи сомонаи вазорат, рӯзи 14 декабр тахминан соати 17:45-дақиқа, Алиев Ҳасан, ки сокини ноҳияи Ҷайҳун ва ронандаи автомашинаи тамғаи “Мерседес-Спринтер” аст, ҳангоми ҳаракат дар ҳудуди ноҳияи Хуросон аз уҳдаи идораи воситаи нақлиёт набаромада, ба автомашинаи боркашии тамғаи “Камаз-65201”, ки таҳти идораи ронанда, Бобохонов Муродхон Бозорқулович, соли таваллудаш 1976, сокини ноҳияи Данғара қарор доштааст, бармехӯрад.
Дар ин бархӯрд ронандаи автомашинаи тамғаи “Мерседес-Спринтер”, Алиев Ҳ.С. ва мусофиронаш: Аҳтамов Ворисҷон Абдуллоевич, соли тавалудаш 2018, сокини ноҳияи А.Ҷомӣ, Сафархонова Саида Ибодовна, соли таваллудаш 1995, сокини ҳамон ҷо, ҷароҳатҳои гуногуни ҷисмонӣ бардошта, дар беморхона, хурдсол Аҳтамов В.А. ба ҳалокат расидааст.
Ҳамзамон, 14-уми декабри соли 2021, тахминан соати 18:40-дақиқа, ронандаи автомашинаи тамғаи “Кия” Пайрамов Умед Худойназарович, соли таваллудаш 1982, сокини шаҳри Турсунзода, ҳангоми ҳаракат дар ҳудуди шаҳри мазкур қоидаҳои ҳаракати роҳро риоя накарда, ба автомашинаи тамғаи “Мерседес-Актрос”, таҳти идораи ронанда, Абиров Хайриддин Ҳамидович, соли таваллудаш 1990, сокини ноҳияи Восеъ, бархӯрдааст. Дар натиҷа, ронандаи автомашинаи тамғаи “Кия” Пайрамов У.Х. ва мусофираш Муҳиддинов Абдураҳмон Абдуҳакимович, соли таваллудаш 1998, сокини шаҳри Турсунзода, ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидаанд.
Ронандаи автомашинаи тамғаи “Мерседес-Актрос” Абиров Х.Ҳ. ва мусофираш Пирумқулов Ҷамшед Файзхонович, соли таваллудаш 1990, сокини ноҳияи Рӯдакӣ, ҷароҳатҳои гуногуни ҷисмонӣ бардошта, дар беморхона, бистарӣ гардидаанд.
Гуфта мешавад, вобаста ба ҳолатҳои мазкур таҳқиқот идома дорад.