Рӯзи 23-июл дар шаҳри Душанбе таҳти сарпарастии Ассотсиатсияи футболи Осиёи Марказӣ нахустин мусобиқа байни дастаҳои миллии футзал оғоз гардид.
Мунтахаби футзали Тоҷикистон дар бозии нахустинаш дар мусобиқаи «CAFA Futsal Cup-2023» аз барандаи медали биринҷии Ҷоми Осиё-2022 – тими милли Ӯзбекистон бо ҳисоби 2:4 шикаст хӯрд. Голҳоро аз ҳайати миллипӯшони тоҷик Файзалӣ Сардоров ва Дилшод Саломов ба самар расониданд.
Дар вохӯриҳои дигари даври аввал дастаи Афғонистон бар тими Қирғизистон бо ҳисоби 5:4 ва тими Туркманистон бар футзалбозони Эрон бо ҳисоби 2:1 пирӯзӣ ба даст оварданд.
Бозиҳои даври дуюм имрӯз, 24-июл сурат мегиранд. Соати 14:00 тимҳои миллии Эрон ва Қирғизистон бо ҳам рақобат мекунанд. Сипас соати 17:00 вохӯрии дастаҳои Ӯзбекистон ва Афғонистон оғоз мешавад. Соати 20:00 бошад тимҳои Тоҷикистону Туркманистон ба ҳам вомехӯранд.