Маркази Ҷумҳуривии таълимӣ- методӣ коргоҳест, ки чун хонаи дуюм барои қаҳрамони нигоштаҳои мо полковники Кумитаи ҳолатҳои фавқулодда Маҳбуба Саидова азизу муқаддас аст. Бо муҳаббат аз дари он ворид мешавад. Маҳбуба аз овони наврасӣ ба бар намудани либоси ҳарбиро орзу мекард. Ҳар боре,ки шодравон тағояш полковники милиса Тешабой Шоев меҳмони хонадони онҳо мешуд, Маҳбубаи наврас, кӯлоҳи афсариашро дуздида, ба сар мекарду назди оинаи барқад даст ба пешонӣ бурда салом медод.
Он замон тағо шавқу завқ ва муҳаббати хоҳарзодаашро дида гуфта буд: “Агар мақсадат хизмат ба миллату давлат ва сазовор шудан ба рутбаҳои олӣ бошад, пас, роҳи сафеду иқболи баланд насибат духтарам”.
Маҳбуба бо дуои пайвандон соҳаи мушкилу масъулиятнок ва ҳамзамон пуршарафу пурифтихор, яъне ҳарбиро интихоб намуда, 22- сол мешавад, ки бо иродаи мардона дар роҳи бузургу беохири ватандорӣ қадамҳои устувор мегузорад. Дар таърихи мавҷудияти Кумитаи ҳолатҳои фавҷулодда Маҳбуба Саидова ягона бонуест, ки давоми солҳои 2005 – 2018 ба ҳайси сардори Ситод оид ба ҳолатҳои фавқулодда ва мудофиаи граждании шаҳри Ваҳдат фаъолият кардааст.
Занонро гар зи дониш зеваре ҳаст,
Умеди рӯзгори дигаре ҳаст….
Бо замзамаи ҳамин мисраъҳои воло Маҳбуба Саидова қариб, ки ҳар рӯз вориди китобхонаи маркази таълимӣ мешавад. Ҳамчун омӯзгор ба шунавандагон аз ҳисоби ҳайати роҳбарикунанда, сардорон, фармондеҳони мудофиаи граждании вазоратҳо, кумитаҳо, раёсатҳо, идораҳо ва ноҳияҳои тобеи ҷумҳурӣ дар синфхонаҳои махсусгардонидашудаи тиббӣ, ҳифзи аҳолӣ ва лингафонӣ дарс мегӯяд. Дарсҳои воқеан ба манфиату фаъолияти пурсамараш бошад боиси ифтихори роҳбарони ин маркази таълимӣ гаштааст.
Маҳбуба Саидова, бонуе бо иродаи мардона ва қалби саршор аз меҳру муҳаббату ихлосу эҳтиром ба Модар-Ватан, замини пурсахо ва ҳунарҳои воло. Ҳар субҳ қабл аз ба кор рафтану ба ҳангоми ғуруб аз кор баргаштан вориди замини назди ҳавлигиаш мешавад. Бӯйи хуши пудинаву райҳон ва атри гулҳои хандону шукуфон руҳашро болидаву хастагиашро дур месозад.
Ҳар ниҳоли боғро донам, ки кас,
Сабз бинмояд, бо чандин ҳавас.
Ниҳолхои дарахтони гуногун, ки Маҳбуба бо ҳавасҳои сабз парвариш намудааст, имрӯз боровар гаштаанду аз меваҳои шаҳдборашон ин олиҳаи зиндагӣ барои зимистон захира дорад.
Маҳбуба Саидова, дар қалби бузурги ин модари тоҷик муҳаббате ба ҳунарҳои мардумӣ чун чашмаҳои куҳсорон ҷӯш мезанаду онҳоро ба шогирдони хушзавқу хушзеҳнаш бо камоли майл меомӯзонад. Маҳбуба Саидова, полковники матинирода, кадбонуи хушрӯзгор, модари хушрафтор ва бибии ширингуфтор. Рӯзгори пур аз саодат насиби ҳамаи шумо модарони соҳибмаълумоту соҳибҳунари Тоҷикистони ҳамешабаҳор.
Холбегим Давлатзода,
радиои “Тоҷикистон”