Дирӯз, дар толори маҷлисгоҳи Кумитаи рушди сайёҳии назди Ҳукумати Ҷумҳурии Тоҷикистон муаррифии вазифаҳо ва нақшаҳои кории ширкатҳои машваратӣ барои таҳияи “Нақшаи генералии сайёҳии шаҳри Душанбе ва минтақаҳои атрофи он” ва “Нақшаи генералии сайёҳии Панҷакент ва минтақаҳои кӯҳҳои Фон” доир гардидааст.
Тавре сомонаи Кумитаи рушди сайёҳӣ хабар медиҳад, дар кори ҷаласа намояндагони вазорату идораҳои дахлдори давлатӣ хусусан Вазорати фарҳанг, Вазорати меҳнат, муҳоҷират ва шуғли аҳолӣ, Агентии омор, Кумитаи давлатии саармоягузорӣ ва идораи амволи давлатӣ, Агентии авиатсияи гражданӣ, Кумитаи меъморӣ ва сохтмон, Кумитаи ҳифзи муҳити зист, Қӯшунҳои сарҳадии Кумитаи давлатии амнияти миллӣ, Сарраёсати консулии Вазорати корҳои хориҷӣ, Сарраёсати меъморӣ ва шаҳрсозии Мақомоти иҷроияи ҳокимияти давлатии шаҳри Душанбе, мақомоти иҷроияи ҳокмияти давлатии шаҳрҳои Бохтар, Ҳисор, Турсунзода, Ваҳдат, ноҳияҳои Ёвон, Шаҳринав, Рӯдакӣ ва бахши хусусӣ фаъолона ширкат намуданд.
Ба иттилои манбаъ, дар ҳамоиш намояндагони ширкатҳои машваратии “HIDRIA Ciencia ambiente y desarollo S.L.”-и испанӣ ва “KEIOS Consulting”-и итолиёвӣ оид ба ҳадафҳои минбаъдаи худ дар мавриди таҳияи нақшаҳои генералии сайёҳии шаҳрҳои Душанбе, Панҷакент ва минтақаҳои атрофи онҳо маърӯза намуданд.
Тавре таъкид шудааст, ки минбаъд бо муваффақият тарҳрезӣ намудани нақшаҳои сайёҳии шаҳрҳои Душанбе, Панҷакент ва минтақаҳои атрофи онҳо аз ҳамкории зич ва ҳамоҳангии дуруст бо сохторҳои марбутаи вобастаии калон дорад. Бинобар ин, аз намояндагони вазорату идораҳои дахлдори давлатӣ ва мақомоти маҳалии шаҳру навоҳии кишвар даъват ба амал оварда шудааст, ки дар давраи татбиқи лоиҳаҳои мазкур ҳамкориҳои худро бо ширкатҳои машваратӣ ҷоннок намоянд.
Гуфта мешавад, ки ширкатҳои машваратӣ дар доираи сафари худ ба шаҳри Душанбе тибқи нақша бо мақсади аз наздик шиносоӣ пайдо намудан бо шаҳру навоҳии шомили минтақаҳои татбиқи лоиҳа ба шаҳру навоҳии вилояти Суғд, шаҳрҳои Кӯлоб, Бохтар, Норак, Ваҳдат, Ҳисор, Турсунзода ва навоҳии атрофи шаҳри Душанбе сафар намуданд. Инчунин онҳо дар ҳошияи ин сафар бо раиси вилояти Суғд, роҳбарияти Мақомоти иҷроияи ҳокимияти давлатии шаҳри Душанбе ва масъулини Агентии омори назди Президенти Ҷумҳурии Тоҷикистон дидору мулоқот анҷом доданд.
Ба таъкиди манбаъ, таҳияи нақшаҳои генералии сайёҳии шаҳри Душанбе ва минтақаҳои атрофи он ва шаҳри Панҷакент ва минтақаҳои кӯҳҳои Фон дар доираи Лоиҳаи рушди сайёҳӣ тавассути ширкатҳои машваратии “HIDRIA Ciencia ambiente y desarollo S.L.”-и испанӣ ва “KEIOS Consulting”-и итолиёвӣ амалӣ мегарданд.