Тими миллии футболи Англия дар даври ниманиҳоии мусобиқоти қаҳрамонии футболи Аврупо бар муқобили Нидерландия бо ҳисоби 2:1 пирӯз шуд. Ҳамин тариқ, бритониёиҳо дар даври ниҳоӣ бо Испания, ки як рӯз пеш дар бозии ниманиҳоӣ бар Фаронса пирӯз шуда буданд, рақобат мекунанд. Футболбозони Англия дар дақиқаи охирини вақти муқаррарӣ ғалабаро ба даст оварданд.
Дастаи Англия бори дуюм паиҳам ба финали чемпионати Аврупо роҳ меёбад. Дар давоми Евро-2020 (бо сабаби пандемияи коронавирус он дар соли 2021 баргузор гардида буд), инглисҳо дар бозии ниҳоӣ дар варзишгоҳи Уэмбли Лондон аз рӯи пеналтӣ аз Италия мағлуб шуданд.
Бар хилофи бисёре аз бозиҳои қаблии Англия (баъзе аз онҳо баъзан бидуни гол анҷом мешуд), ин бозии ниманиҳоӣ вазъияти пуршиддат буд. Мунтахаби Ҳолланд дар дақиқаи шашум ҳисобро боз кард. Дар дақиқаи 78-ум инглисҳо тӯбро ба дарвозаи ҳариф равон карданд, вале ин ҳолат аз ҷониби довар офсайд ҳисобида шуд.
Ҳамин тавр, мунтахаби Англия дар дақиқаи охирини вақти муқаррарӣ голи ҳалкунандаро ба самар расонд. Сарнавишти бозӣро ҳамлагари “Астон Вилла” Олли Уоткинс ҳал кард, ки ба ҳайси эҳтиётӣ ба майдон баромад.
Бояд гуфт, ки мунтахабҳои Испания ва Англия дар мусобиқаҳои ниҳоии Евро бо ҳам ҳамагӣ 2 бор бозӣ кардаанд. Дар ин бозиҳо ду ғалаба ба фоидаи Англия ба қайд гирифта шудааст. Аввалин бор дастаҳо соли 1980 дар марҳилаи гурӯҳӣ бо ҳам бозӣ карда буданд, ки Англия бо ҳисоби 2 бар 1 Испанияро шикаст дод. Бозии дуюми дастаҳо соли 1996 дар марҳилаи чаҳорякниҳоӣ баргузор шуда буд,ки Англия дар силсилазарбаҳои 11 метра бо ҳисоби 4 бар 2 пирӯз шуда буд.
Ҳамин тавр бо гузаро шудани 28 сол боз мунтахабҳои Испания ва Англия бо ҳам рӯ ба рӯ мешаванд. Ин маротиб дастаҳо дар финали Евро -2024 бо ҳам бозӣ мекунанд. Вохӯрии дастаҳо рӯзи 14-уми июл соати 23:50 дақиқа ба вақти Душанбе дар назар аст.