202 млн. сомонӣ: Ҳаҷми маблағи хизматрасонии коммуналӣ дар соли 2022

Аз ҷониби КВД “Хоҷагии манзилию коммуналӣ” дар соли 2022 ба истифодабарандагон бо маблағи 202 млн. 427,2 ҳазор сомонӣ хизматҳои гуногуни коммуналӣ расонида шудааст, ки нисбат ба соли 2021, 5 млн. 800,1 ҳазор сомонӣ зиёд аст.

Ҷӯрахон Ғаффорзода, муовини якуми директори КВД “Хоҷагии манзилию коммуналӣ” 3 феврал зимни нишасти матбуотӣ бо баёни ин нукта ҳамчунин зикр намуд, ки ҳаҷми маблағи хизматрасониҳои корхонаҳои давлатии фаръии соҳаи хоҷагии манзилию коммуналӣ низ дар соли сипаришуда афзоиш ёфта, ба 85 млн. 419, 8 ҳазор сомонӣ расидааст, ки нисбат ба соли қабл 3 млн. 195 ҳазор сомонӣ бештар мебошад.

Таъкид гардид, ки дар маҷмуъ ҳаҷми маблағи ҷудошуда дар соли 2022 барои таҷдиду барқарорсозии 42 адад иншооти оби нӯшокӣ, рафъи обҳои партов ва хоҷагии манзилию коммуналии шаҳру ноҳияҳо 14 млн. 500 ҳазор сомониро ташкил медиҳад, ки нисбат ба соли 2021, 1 млн. сомонӣ зиёд аст.

Ҳамчунин дар нишаст гуфта шуд, ки ҳоло дар КВД “Хоҷагии манзилию коммуналӣ” қариб 132.5 млн. доллари амрикоӣ лоиҳаҳои сармоягузорӣ татбиқ мегарданд, ки ҳадафи асосӣ беҳтар намудани обтаъминкунӣ мебошад.