Рӯзи 31-уми май дар меҳмонхонаи “Румӣ”-и шаҳри Душанбе маросими қуръакашии марҳилаи муқаддамотии Ҷоми Тоҷикистон-2022 доир карда шуд.
Дар марҳилаи муқаддамотии Ҷоми Тоҷикистон-2022 аз дастаҳои лигаи аввал 12-даста ҳунарнамоӣ мекунанд, ки дар қуръакашӣ аз онҳо 6-гурӯҳ ташкил карда шуд. Дар ин марҳилаи мусобиқа дастаҳои “Панҷшер” бо “Динамо”, “Ваҳдат” бо “Ҳосилот”, “Моҳир” бо “Душанбе”, “Ҳулбук” бо “Сарҳадчӣ”, “Саройкамар” бо “Гулистон” ва “Барқчӣ” бо “Кӯктош” нерӯсанҷӣ хоҳанд кард.
Бозиҳо аз як вохӯрӣ иборат буда, рӯзҳои 4-ум ва 5-уми июн баргузор мешаванд. Дастаҳои ғолиб ба даври 1/8 ниҳоӣ роҳ меёбанд, ки дар ин давр бошгоҳҳои лигаи олии Тоҷикистон ба мусобиқа ҳамроҳ мешаванд.
Дидори дастаҳои “Панҷшер” ва “Динамо” дар рӯзҳои эҳтиётӣ баргузор мешавад, зеро футболбозони дастаи “Динамо” ҳайати асосии мунтахаби ҷавонони Тоҷикистон (U-20)-ро ташкил медиҳад, ки рӯзҳои 2-юм ва 4-уми июн дар Душанбе бо тими мунтахаби Аморати Муттаҳидаи Араб (U-20) бозии дӯстона анҷом медиҳад.
Қобили зикр аст, ки барандаи Ҷоми Тоҷикистон-2022 ҳақи муаррифии кишвари моро дар Ҷоми КФО-2023/2024 ба даст меорад. Дар сурате, ки як бошгоҳ ҳам қаҳрамони Тоҷикистон ва ҳам соҳиби Ҷоми кишвар шавад, пас барандаи медали биринҷии лигаи олии Тоҷикистон дар мавсими оянда дар Ҷоми КФО ширкат меварзад.
Ҷоми Тоҷикистон-2022
Марҳилаи муқаддамотӣ
4-уми июн (шанбе)
Соати 17:00
“Ваҳдат” – “Ҳосилот”
“Моҳир” – “Душанбе”
5-уми июн (якшанбе)
Соати 17:00
“Ҳулбук” – “Сарҳадчӣ”
“Саройкамар” – “Гулистон”
“Барқчӣ” – “Куктош”.
Сорбон Амонуллозода
радиои “Тоҷикистон”