Дар даври ҳаштуми мусобиқаи қаҳрамонии футболи Тоҷикистон миёни дастаҳои Лигаи олӣ чор бозӣ сурат гирифт, ки ғолибонро муайян намуд.
Ҳамин тариқ, дастаи «Истиқлол»-и Душанбе дар даври даври ҳаштум дар майдони худ бар тими футболи «Регар-ТадАЗ»-и Турсунзода бо ҳисоби 3:1 пирӯз шуд. Голҳои дастаи «Истиқлол»-ро Манучеҳр Ҷалилов, Рустам Соиров, Шервонӣ Мабатшоев ва голи дастаи «Регар-ТадАЗ»-и шаҳри Турсунзодаро Фатҳулло Фатҳуллоев ба самар расониданд, хабар медиҳад Федератсияи футболи Тоҷикистон.
Дастаи дигари пешсафи мусобиқаи қаҳрамонӣ – дастаи «Хатлон»-и Бохтар дар майдони худ тими футболи «Равшан»-и Зафарободро бо ҳисоби 1:0 шикаст дод. Голи пирӯзиовар дар дақиқаи 57-ум аз сӯйи Нуриддин Ҳамроқулов зада шуд. Дар бозии дигар дастаи футболи «Хуҷанд»-и шаҳри Хуҷанд дастаи «Истаравшан»-и шаҳри Истаравшанро бо натиҷаи 1:0 мағлуб намуд. Голи ягонаро Фирдавс Чақалов ба нишон расонид.
Дар бозӣ миёни дастаҳои футболи КМВА-и шаҳри Душанбе ва «Файзканд»-и ноҳияи Восеъ ғолиб муайян нашуд. Вохӯрии дастаҳо мусовӣ – 2:2 анҷом ёфт. Ҳар чор гол дар нимаи дуюми бозӣ зада шуд. Бозигарони дастаи «Файзканд»-и ноҳияи Восеъ Доробҷон Эргашев дар дақиқаи 63, Амирҷон Сафаров дар дақиқаи 72 ду гол зада, дастаашонро ба пеш бароварданд, аммо бозигарони дастаи футболи КМВА-и шаҳри Душанбе дар дақиқаҳои охир тавонистанд ду гол зада, аз бохт наҷот ёбанд. Голҳои КМВА-ро Хуршед Абдуллоев ва Наврӯз Рустамов ба ҳадаф расониданд.
Ёдрас мешавем, ки як бозии дигари даври ҳаштум 22 майи соли равон миёни дастаҳои футболи «Эсхата»-и шаҳри Хуҷанд ва «Равшан»-и шаҳри Кӯлоб баргузор мешавад.