Паҳлавони ҷавону умедбахши тоҷик Сомон Маҳмадбеков, ки Тоҷикистонро дар 32-юмин Бозиҳои олимпӣ дар вазни зери 73кг намояндагӣ мекунад, ба даври 1/8 финал роҳ ёфт.
Ин муаррифгари миллати тоҷик дар арсаи байналмилалӣ дар даври аввал намояндаи кишвари гурезаҳо- Аҳмад Аликайро дучори шикаст намуд. Дар даври 1/16 финал бошад, Сомони мо аз пеши роҳаш ҷудочии кишвари Гамбия Файе Нжие дур кард. Акнун дар даври 1/8 финал Сомонро ноибқаҳрамони Бозиҳои олимпии Рио-2016 ҷудочии муваффақи озарӣ – Рустам Оруҷов имтиҳон мекунад. Дар ин рақобати ҳадид ба Маҳмадбеков барору комёбӣ таманно дорем.
Ин дуюм варзишгари тоҷик аст, ки ба 1/8 финали Бозиҳои олимпӣ роҳ ёфт. Аз ин пеш Баҳодур Усмонов дар вазни 63 кило рақибаш аз Доминикан Леонел Сантос Нунезро шикаст дод, дар даври баъдӣ бо муштзани ӯзбекистонӣ Элнур Абдураҳимов зӯрозмоӣ хоҳад кард.
Аз Тоҷикистон ба ин Олимпиада 10 варзишгар рафта буданд.
Акмал Муродов 27-уми июл ба рақобат мепардозад. Комроншоҳи Устопириён 28-уми июл ва Темур Раҳимов 30-юми июл вориди рақобат мешаванд.
Комроншоҳи Устопириён дар вазни то 90 кило ба рақобат аз даври дувум мепардозад. Рақибаш Аксел Клергет аз Фаронса аст, ки дар феҳристи ҷаҳонӣ нисбат ба Комроншоҳ панҷ зина болост (ҷойи 17-ум). Дар ин вазн 33 гуштигир барои ҷоизаҳо талош мекунанд.
Темур Раҳимов дар вазни беш аз 100 кило дар даври аввал бо Энди Гранда аз Куба қувваозмоӣ хоҳад кард. Энди дар феҳристи ҷаҳонӣ нисбат ба Темур се зина поён аст (20-ум). Дар ин вазн 22 нафар сабти ном шудаанд.
Дар намуди дигар – шиноварӣ ба масофаи 50 метр бо тарзи озод Анастасия Тюрина ва Олимҷон Ишонов 30-юми июл ба рақобат мепардозанд. Илдар Аҳмадиев оид ба варзиши сабук дар давидан ба масофаи 100 метр миёни мардон рӯзи 31-уми июл рақобат хоҳад кард.
Сипас Шаббос Неъматуллоев дар вазни то 81 кило бо Даксианг Чен аз Чин вориди рақобат шуд. Дар ин сабқат намояндаи Чин бо ҳисоби 4:0 ғолиб омад. Шаббос аз ҳаққи ширкат дар даври баъдӣ маҳрум гашт.
Муштзани дигари тоҷик Сиёвуш Зуҳуров, писари Бег Сабур, раиси Хадамоти алоқаи Тоҷикистон, 29-уми июл дар вазни беш аз 91 кило қувваозмоиро аз даври 1/8-ниҳоӣ шуруъ мекунад. Рақибаш Мурод Алиев аз Фаронса аст.