Акс аз саҳифаи корбарони Фейсбук
Донишкадаи технология ва менеҷменти иноватсионии шаҳри Кӯлоб бар асари риоя накардани меъёру талаботи қоидаҳои бехатарӣ аз сӯхтор оташ гирифт.
Дар ин бора ВКД хабар дода, мегӯяд, ки субҳи имрӯз дар масоҳати 200 метри мураббаъ болопӯши боми бино ва толори маҷлисгоҳи донишкада оташ сар задааст. Ба гуфтаи баъзе аз шоҳидони ҳодиса маҷлисгоҳи донишкада ба тамом сӯхтаааст ва сӯхтори мазкур бо қуваю воситаҳои ҷузъу томҳои хадамоти давлатии оташнишонии Вазорати корҳои дохилӣ, бо пурраги хомӯш карда шуд.
Ҳодиса соати 03:50 дақиқа рух додааст, аз ин рӯ эҳтимоли зарари ҷонӣ надоштан мавҷуд аст, аммо айни ҳол аз тарафи мутахассисони Хадамоти давлатии оташнишонии ВКД ва дигар сохторҳои дахлдор таҳқиқи ҳодиса давом дошта, зарар ва сабаби сухтор муайян карда мешавад.
Хабари мазкур низ бо дарёфти тафсилоти бештар мукаммал мегардад.
Бояд гуфт, ки донишкадаи мазкур ҳамчун Филиали Донишгоҳи технологии Тоҷикистон дар шаҳри Кӯлоб соли 2003 таъсис ёфта, соли 2015 мақоми Донишкадаи технология ва менеҷменти инноватсионии Вазорати саноат ва технологияҳои нави Ҷумҳурии Тоҷикистонро касб намуд.