Нимҳимоятгари “Манчестер Сити” ва мунтахаби Испания – Родрӣ барандаи ҷоизаи инфиродии “Туби тиллоӣ” дар мавсими 2024 гардид. “Реал Мадрид” надодани ин ҷоиза ба яке аз бозигарони бошгоҳи “Шоҳонаро” беэҳтиромӣ нисбати даста дониста, дар маросим иштирок накард.
Рӯзи гузашта дар пойтахти Фаронса шаҳри Париж маросими супурдани ҷоизаи “Туби тиллоӣ” доир гардид. Родрӣ ҷоизаи “Тӯби тиллоӣ-2024”-ро соҳиб гардид. Нимҳимоятгари 28-солаи испанӣ дар мавсими 2023/24, дар ҳайати дастаи «Манчестер Сити» қаҳрамони Англия, Ҷоми ҷаҳонии бошгоҳҳо ва Суперҷоми УЕФА гардида, дар ҳайати тими миллии Испания қаҳрамони ЕВРО-2024 шуд. Илова бар ин, Родрӣ беҳтарин бозигари Евро-2024 эътироф гардид.
Дар мубориза барои ин ҷоиза бозигарони бошгоҳи мадридӣ Винисиус, Беллингем ва Карвахал мавқеъҳои 2-юм то 4-умро соҳиб гардиданд.
“Реал Мадрид” пас аз огаҳӣ аз пирӯзии Родри сафарашро ба маросими супурдани “Тӯби тиллоӣ” ба шаҳри Париж лағв кард. Винисиус тасмим гирифт, ки дар ин чорабинӣ иштирок накунад – бошгоҳи мадридӣ ӯро дастгирӣ карданд. Ҳамчунин “Реал Мадрид” аз пахш намудани барномаи панҷсоатаи “Тӯби тиллоӣ” дар телевизиони бошгоҳ худдорӣ намуд. Даста аз “беадолатӣ” хашмгин аст. Бошгоҳи “Шоҳона” ҳайрон аст, агар натиҷаҳо дар ЕВРО-2024 таъсиргузор буд, пас чаро Карвахал барандаи ин ҷоиза нагардид? “Реал” пирӯзии «Тӯби тиллоӣ»-и Родриро беэҳтиромӣ нисбати бошгоҳ дониста, эътироф мекунад, ки муносибатҳои бад бо УЕФА таъсир кардаанд.
Ҳамчунин дар чорабинии “Туби тиллоӣ” ба як қатор бозигарони дигар ҷоизаҳо тақдим гардид, ки бозигарони мазкур соҳиби он гардиданд:
– Ламин Ямал ҷоизаи Kopa Trophy – ҷоиза барои беҳтарин бозигари ҷавонро ба даст овард. Бозигари 17-солаи Барселона ва тими миллии Испания Ҷоми Копаро гирифт. Ҷоиза ба номи собиқ нимҳимоятгари мунтахаби Фаронса Раймонд Коп ба беҳтарин футболбози то 21-солаи ҷаҳон дода мешавад.
– Эмилиано Мартинес дарвозабони “Астон Вилла” ва мунтахаби Аргентина барои мавсими дуюм пайиҳам ҷоизаи Яшинро аз France Football гирифт, ки ба беҳтарин дарвозабони сол дода мешавад.
– Футболбози тими занонаи “Барселона” Айтана Бонмати соҳиби “Тӯби тиллоӣ” миёни занон шуд.
– Ҷенни Ҳермосо футболбози Тигрес ва тими миллии Испания ҷоизаи Сократро барои фаъолияташ берун аз футбол ба даст овард. Ин ҷоиза ба футболбозони хайрхоҳ дода мешавад.
– Карло Анчелотти беҳтарин мураббии сол дониста шуд. Ба итолиёвӣ, ки сармураббии тими “Реал Мадрид”аст, ҷоизаи Йохан Кройффро аз France Football тақдим намуданд.
– “Реал Мадрид” бошад беҳтарин бошгоҳи мавсими France Football гардид. Мадрид дар мавсими гузашта Лигаи Чемпионҳо, Ла Лига ва Суперҷоми Испанияро ба даст овард.
Рустами Зоир
радиои “Тоҷикистон”
Акс аз саҳифаи расмии Ballondor