Бино ба қуръакашии сабқати интихобии Ҷоми Осиё-2023, ки имрӯз дар қароргоҳи Конфедератсияи футболи Осиё дар шаҳри Куала-Лумпур (Малайзия) баргузор шуд, мунтахаби Тоҷикистон дар гурӯҳи “F” бозӣ мекунад.
Ҳамин тариқ, дар натиҷаи қуръакашӣ 6 гурӯҳи иборат аз 4-дастаӣ таъсис ёфт. Мунтахаби Тоҷикистон дар як гурӯҳ бо Қирғизистон, Мянма ва Сингапур бозӣ мекунад.
Гуфта мешавад, бозиҳои гурӯҳи мо дар шакли мутамарказ дар як давр – рӯзҳои 8-ум, 11-ум ва 14-уми июн дар Бишкек баргузор мегарданд.
Бояд гуфт, ба даври ниҳоии Ҷоми Осиё-2023 11 даста, 6 ғолиби гурӯҳ ва ҳамчунин 5 дастае, ки бо натиҷаҳои беҳтарин дар ҷойи дувум қарор гирифтанд, роҳхат мегиранд.
Натиҷаҳои қуръакашии сабқати интихобии Ҷоми Осиё-2023:
Гурӯҳи “А”: Урдун, Қувайт (мизбон), Индонезия, Непал.
Гурӯҳи “В”: Фаластин, Филиппин, Яман, Муғулистон (мизбон).
Гурӯҳи “C”: Ӯзбекистон (мизбон), Тайланд, Малдив, Шри-Ланка.
Гурӯҳи “D”: Ҳиндустон (мизбон), Ҳонконг, Афғонистон, Камбоҷа.
Гурӯҳи “Е”: Баҳрайн, Туркманистон, Малайзия (мизбон), Бангладеш.
Гурӯҳи F: Қирғизистон (мизбон), Тоҷикистон, Мянмар, Сингапур.
Сорбон Амонуллозода,
Радиои “Тоҷикистон”