Бозиҳои даври аввали марҳилаи ниманиҳоии Ҷоми Тоҷикистон бо ғалабаи “Регар-ТадАЗ” бар “Истиқлол” ва муосвии “Хуҷанд” бо “Равшан” ба охир расид.
Рӯзи гузашта бозиҳои аввали марҳилаи ниманиҳоии Ҷоми Тоҷикистон оид ба футбол доир гардид. Дастаи “Истиқлол”-и Душанбе дар бозии аввал, дар Варзишгоҳи марказии шаҳри Душанбе бо “Регар-ТадАЗ”-и шаҳри Турсунзода рақобат карда, бо ҳисоби 0 бар 2 ноком гардид.
Голҳои “Регар-ТадАЗ”-ро дар ин вохӯрӣ бозигарони хориҷӣ Ҷозеф Фаумба ва Квадво Фримпонг ба самар расониданд.
Бозии дигари ин марҳила миёни дастаҳои “Хуҷанд”-и Хуҷанд ва “Равшан”-и Кӯлоб дар варзишгоҳи “Спартак”-и шаҳри Хуҷанд доир гардида, бо ҳисоби мусовӣ, 1 бар 1 ба охир расид.
Ҳамакунун дар бозиҳои ҷавобӣ маълум хоҳад гашт, ки кадом дастаҳо ба финал роҳ меёбанд.
Рустам Зоиров
радиои “Тоҷикистон”
Акс аз саҳифаи расмии бошгоҳи “Истиқлол”