Конфедератсияи футболи Осиё вақти баргузории бозиҳои даври муқаддамотӣ ва марҳилаи плей-оффи Ҷоми КФО-ро дар мавсими 2023/2024 эълон кард.
Барандаи медали биринҷии Чемпионати Тоҷикистон дастаи «Хуҷанд» дар марҳилаи плей-оффи Ҷоми КФО дар мавсими 2023/2024 дар минтақаи марказӣ бо ғолиби даври муқаддамотӣ «Марв» (Туркманистон) – «Олой» (Қирғизистон) вомехӯрад. Ин рақобат рӯзи 22-август дар варзишгоҳи «20-солагии Истиқлолияти Тоҷикистон» воқеъ дар шаҳри Хуҷанд баргузор мешавад.
Бозии даври муқаддамотии Ҷоми КФО дар мавсими 2023/2024 миёни дастаҳои «Марв» ва «Олой» рӯзи 15-август дар Туркманистон баргузор мешавад.
Даври муқаддамотии Ҷоми КФО ва марҳилаи плей-офф аз як бозӣ иборат хоҳад буд.
Дар сурати муваффақ шудан дар марҳилаи плей-оффи Ҷоми КФО бошгоҳи футболи «Хуҷанд» дар баробари бошгоҳҳои «Равшан» (Тоҷикистон), «Алтин Асир» (Туркманистон) ва «Абдиш-Ата» (Қирғизистон) ҳақи иштирок дар марҳилаи гурӯҳии минтақаи марказиро пайдо мекунад.
Даври гурӯҳии Ҷоми КФО дар мавсими 2023/24 дар минтақаи марказӣ 20-сентябр оғоз шуда, 14-декабр ба анҷом мерасад. Танҳо ғолиби гурӯҳҳо ба марҳилаи навбатии мусобиқа роҳ меёбанд.
Сорбон Амонуллозода