Рӯзҳои 27-ум ва 28-уми август дастаҳои “Файзканд” – “Куктош” дар майдони “Нефтяник”-и ноҳияи Рӯдакӣ рақобат намуданд.
Бозингари “Файзканд” Обама Арсен дар дақиқаи 9-уми бозӣ ҳисобро боз кард. Дар дақиқаи 34-уми рақобат футболбози тими мизбон Худойдод Узоқов ҳисоби бозиро баробар намуд.
Дар дақиқаҳои охири бозӣ, аниқтараш дар дақиқаи 87-уми рақобат Худойдод боз як гол зада, ғалабаи дастаашро таъмин намуд.
Рӯзи 28 август се бозии дигар баргузор гардид. Дар ин рӯз дастаи “Эсхата” бар дастаи “КМВА” бо ҳисоби 1:0 пирӯз шуд. Вохӯрии дастаҳо дар варзишгоҳи “Спартак”-и шаҳри Хуҷанд баргузор гардид.
Голи ягонаи ин вохӯриро Санҷар Рихсибоев дар аввали нимаи дуюми дидор ба самар расонида, ғалабаи тимашро таъмин намуд.
Бошгоҳи “Саройкамар”-и Панҷ дар бозии хонагӣ аз тими “Хатлон”-и Бохтар дучори шикаст гардид. Ин рақобат низ бо натиҷаи 0:1 бар нафъи меҳмонон хотима ёфт. Ягона голро Тоҳирҷон Тағойзода дар дақиқаи 80-ум вориди дарвозаи рақиб намуд.
Дар бозии охирини даври 1/4 ниҳоӣ бошгоҳи “Истиқлол” бо натиҷаи 1:0 бар дастаи “Равшан”-и Кӯлоб ғалаба кард. Голро дар дақиқаи 15-ум Манучеҳр Ҷалилов ба ҳадаф расонид.
Ҳамин тариқ, дар бозиҳои даври нимниҳоии Ҷоми Тоҷикистон-2022 “Истиқлол” бо “Эсхата” ва “Хатлон” бо “Куктош” дидор анҷом медиҳад.
Сорбон Амонуллозода,
радиои “Тоҷикистон”