Дар Вазорати маориф ва илми Ҷумҳурии Тоҷикистон вохӯрии муовини якуми вазири маориф ва илм Ҷамшед Ҷӯразода бо Сафири Ҷумҳурии Индонезия дар Тоҷикистон Муҳаммад Фаҷрул Раҳмон баргузор гардида, ҷонибҳо иброз доштанд, ки баъд аз ташрифи сафир ба Вазорати маориф ва илм дар рушди муносибатҳо миёни ду кишвар қадамҳои устувор ва натиҷабахш гузошта хоҳад шуд.
Дар ин хусус Маркази матбуоти ин Вазорат хабар дода, навиштааст, ки вохурӣ 15-уми июн баргузор шуд. Ба иттилои манбаъ, зимни суҳбат ҷонибҳо аз ҳамкориҳои ҷойдошта изҳори қаноатмандӣ намуда, таъкид доштанд, ки ҳамасола аз ҷониби Ҷумҳурии Индонезия барои шаҳрвандони Ҷумҳурии Тоҷкистон бурсияҳои таҳсилӣ дар доираи барномаи яксолаи омӯзиши забон, санъат ва фарҳанги Инденезия “Дарсмасисва” ҷудо мегардад.
Гуфта шудааст, ки имкониятҳои истифоданашуда дар соҳаи маориф ва илми ҷумҳуриҳои Тоҷикистону Индонезия зиёд мебошад. Ҳамзамон, ҷонибҳо пешниҳод намуданд, ки ҷиҳати вусъат бахшидани ҳамкориҳо дар соҳаи маориф ва илм ҳамкориҳо миёни муассисаҳои таҳсилоти олии касбии ду кишвар ба роҳ монда шуда, барои шаҳрвандони ҳарду кишвар бурсиҳои таҳсилии бештар ҷудо карда шавад. Инчунин, миёни омӯзгорону муҳаққиқон табодули таҷриба сурат гирифта, ҳамоишҳои илмӣ ва таҳқиқотҳои муштарак ба роҳ монда шавад.