Марҳилаи гурӯҳии Ҷоми AFC-2022 дар Душанбе баргузор мешавад

Конфедератсияи футболи Осиё кишварҳоеро тасдиқ кард, ки дар онҳо бозиҳои мутамаркази марҳилаи гурӯҳии Ҷоми AFC-2022 баргузор мешаванд.

Бозиҳои Ҷоми AFC-2022 дар гурӯҳи “Е” бо ширкати барандаи медали биринҷии чемпионати Тоҷикистон “КМВА” аз 24-30 июн дар шаҳри Душанбе баргузор мешаванд. “КМВА” дар нахустин Ҷоми AFC бо бошгоҳҳои “Насаф” ё “Суғдиёна” (Ӯзбекистон), “Олтин Асир” (Туркманистон) ва “Нефтчӣ” (Қирғизистон) бозӣ мекунад.

Бозиҳои гурӯҳи “F” бо ширкати “Хуҷанд” аз 24-30 июн дар Бишкеки Қирғизистон баргузор шуда, дар он ноиби чемпиони Тоҷикистон бо қаҳрамони Қирғизистон “Дордой” ва “Копетдаг”-и Туркманистон вомехӯранд.

Бояд гуфт, ки агар дар Ҷоми AFC-2022 ба марҳилаи гурӯҳии Лигаи қаҳрамонҳои Осиё-2022 дастаи Қарши “Насаф” роҳ ёбад, барандаи медали нуқраи чемпионати Ӯзбекистон “Ҷиззах-Суғдиёна” баромад хоҳад кард. Агар “Насаф” ба марҳилаи гурӯҳии Лигаи қаҳрамонҳо роҳ наёбад, дар Ҷоми AFC-2022 баромади худро идома медиҳад.

Ҷоми AFC 2022
Минтақаи марказӣ
Гурӯҳи “Е”: “Насаф” ё “Суғдиёна” (Ӯзбекистон), “Олтин Асир” (Туркманистон), “КМВА” (Тоҷикистон), “Нефтчӣ” (Қирғизистон).

Гурӯҳи “F”: “Хуҷанд” (Тоҷикистон), “Дордой” (Қирғизистон), “Копетдаг” (Туркманистон).

Сорбон Амонуллозода,

радиои “Тоҷикистон”