Ба ҳолати 1-уми июли соли 2024 дар шаҳру ноҳияҳои ҷумҳурӣ мувофиқи маълумотҳои оморӣ 10934 иншооти варзишӣ новобаста аз шакли моликияташон ба қайд гирифта шудааст.
Дар ин бора зимни нишасти матбуотии Кумитаи кор бо ҷавонон ва варзиши назди Ҳукумати Ҷумҳурии Тоҷикистон, муовини якуми раиси Кумита Шабнам Раҳимзода иттиллоъ дода, афзуд аз ин шумора 126 варзишгоҳ, 7601 майдончаи варзишӣ, 2251 толори варзишӣ ва 771 иншооти махсуси варзишӣ аз қабили тир, боулинг, фитнес, билярд, каток, тенниси рӯи миз ва клубҳои ихтиёрӣ мавҷуд мебошанд.
Ба иттилои манбаъ, дар нимсолаи якуми соли 2024 дар шаҳру ноҳияҳои ҷумҳурӣ 49 иншооти варзишӣ бо маблағи 17 миллиону 450 ҳазор сомонӣ сохта ба истифода дода шудааст, ки аз ин 2 миллиону 310 ҳазор сомонӣ аз ҳисоби маблағҳои буҷетӣ ва 15 миллиону 140 ҳазор сомонӣ аз ҳисоби соҳибкорону сарпарастон мебошад.
Рустами Зоир,
радиои “Тоҷикистон”