Терроризм ва экстремизм, аз як ҷониб чун вабои аср хатари глобалии ҷиддӣ буда, аз ҷониби дигар, аъмоли он гувоҳ аст, ки террорист ватан, миллат ва дину мазҳаб надорад, балки як таҳдиде ба ҷомеаи ҷаҳонӣ ва ҷони ҳар як сокини сайёра аст.
Эмомалӣ Раҳмон
Ҷаҳони муосирро аз ибтидои аср терроризми байналхалқӣ ҳамроҳӣ намуд. Ҳодисаи террористии 11-уми сентябри соли 2001 ояндаи ҷаҳонро дигаргун сохт. Пас аз ин ҳодиса, кулли башар танҳо дар бораи “Ал-қоида”, терроризм, Афғонистон ва даҳшатафканӣ андеша менамуданд. Агарчӣ амалиёти террористии 11 сентябр як амалиёти сунъӣ ва сохтаи дасти гурӯҳи махфӣ буд, вале равандҳои сиёсии олами муосирро дигаргун сохт. Баъд аз ин амалиёт, кишварҳои сайёра ҳамоишу конфронсҳо ташкил намуда дар андешаи нобудии терроризм амал менамуданд. Вале 20 сол мешавад, ки ҳеҷ кишваре натавонистааст, ки ин зуҳуроти номатлубро аз ҷомеаи ҷаҳонӣ пок созад. Ҷумҳурии Тоҷикистон ҳамчун иштирокчии муносибатҳои байналмилалӣ терроризмро маҳкум намуда, ҳамчун кишвари сулҳҷӯ дар олам дониста мешавад.
Президенти Ҷумҳурии Тоҷикистон муҳтарам Эмомалӣ Раҳмон чандин маротиба аз минбари Созмони Миллали Муттаҳид ва дигар созмонҳои бонуфузи ҷаҳонӣ таъкид бар он намудаанд, ки террорист ватану миллат ва мазҳаб надорад. Ба андешаи Пешвои миллат ба ҳеҷ ваҷҳ терроризм боиси таҳсин нест ва дар ҳамаи ҳолатҳо онро бояд қатъиян маҳкум намуд. Аз ин рӯ, қобили таъкид аст, ки терроризм ягон дину мазҳаби мушаххас, пайдоиши этникӣ, миллат ва ҷойгиршавии доимии ҷуғрофӣ надорад. Кӯшишҳои бо ҳам пайваст намудан ё тавъам донистани терроризм бо дину мазҳаби мушаххасе дар воқеъ ба манфиати террористон хизмат мекунад ва биноан, ин кӯшишҳо бояд қатъиян маҳкум карда шавад.
Пешвои миллат муҳтарам Эмомалӣ Раҳмон дар ҳама вохӯрӣ ва паёмҳояшон доимо таъкид бар он менамоянд, ки мо бояд бо ин зуҳуротиноматлуб дар мубориза қарор дошта бошем. Дар Паёмашон, ки соли 2015 ба Маҷлиси Олӣ ироа гардида буд, Сарвари давлатдар баробари масоили иқтисодӣ ва иҷтимоиву фарҳангӣ масъалаи истифода гардидани дини мубини Ислом аз ҷониби гурӯҳҳои террористӣ бо мақсади ҳадафҳои нопок миллати тоҷикро хотирнишон карда буданд. Ба андешаи Сарвари давлат терроризм ва экстремизм таҳдиди нав ба тамаддуни башарӣ буда, ин ҳолат метавонад тақдири тамоми башарро ба хатарҳои ҷиддӣ рӯ ба рӯ созанд.
Пешвои миллат тамоми ҷаҳониёнро ба таҳаммулу гуфтугӯи тамаддунҳо даъват намуда, таъкид менамоянд, ки бояд оламеро шакл диҳем, ки орӣ аз хушунат, қатлу куштор ва терроризму экстремизм бошад. Сарвари давлат қайд менамоянд, ки: “Имрӯз мо ниёз ба тақвияти ҳарчи бештари асли таҳаммулгароӣ дорем, ки мардуми мусулмонро чун мардуми мутамаддин ва фарҳангиву илмпарвар таҷассум намояд ва ҷиҳати ҳамкории ҳамаи нерӯҳои солими башарият хизмат кунад. Бинобар ин, мо бояд тамоми василаву воситаҳоро истифода кунем, ки эҳтироми ғояву андешаҳои солиму созанда ва таҳаммули фикри якдигар тамоюли асосии дунёи имрӯз гардад”.
Дар шароити имрӯза Ҷумҳурии Тоҷикистон ҳамчун субъекти муносибатҳои байналхалқӣ аз таҳдидҳои терроризм ва экстремизм эмин буда наметавонад. Дар ҳоли ҳозир, хатари терроризм беш аз пеш ба амнияти байналхалқӣ эҳсос карда мешавад. Ҷумҳурии Тоҷикистон дар сатҳи байналхалқӣ ҳамчун актори сиёсие дониста мешавад, ки мавқеи зиддитеррористиро пеша кардааст. Тоҷикистон дар танҳоӣ наметавонад бар зидди ин падидаи номатлуб мубориза барад. Моро лозим аст, то баҳри ҳимоя аз манфиатҳои миллӣ ва таъмини амнияти давлатӣ бо субъектони дигари байналхалқӣ дар ҳамкории доимӣ қарор дошта бошем.
Рухсора ДАВЛАТОВА,
мудири китобхонаи илмии Академия