Нимаи дуюми рӯзи 17-уми август дар пойтахти Хорватия шаҳри Загреб, маросими қуръакашии мусобиқаи Zagreb Grand Prix 2023 баргузор гардид.
Тибқи иттилои сомонаи расмии Федератсияи байналмилалии ҷудо (IJF) дар ин мусобиқа 530-варзишгар (317-мард, 213-зан) аз 83-кишвари иштирок менамоянд.
Тоҷикистонро дар ин мусобиқа 2-варзишгар Обид Ҷебов (-66кг) ва Ҷаҳонгир Маҷидов (-90кг) намояндагӣ мекунанд.
Мусобиқаи Zagreb Grand Prix 2023 аз имрӯз – 18-уми август бо қувваозмоиҳо дар вазнҳои -60кг, -66кг миёни мардон ва дар вазнҳои -48кг, -52кг, -57кг миёни бонувон оғоз мегардад. Фардо 19-уми август мардҳо дар вазнҳои -73кг, -81кг, бонувон дар вазнҳои -63кг, -70кг рақобат мекунанд. Дар рӯзи охири мусобиқа 20-уми август бошад мардҳо дар вазнҳои -90кг, -100кг, +100кг, бонувон дар вазнҳои -78кг, +78кг барои нишонҳои ифтихорӣ сабқат менамоянд.
Дар рӯзи аввали мусобиқа кишвари моро дар вазни -66кг Обид Ҷебов муаррифӣ мекунад. Обид дар рақобати аввалинаш бо ҷудокори Литва – Андрей Клоков барои роҳ ёфтан ба давраҳои дигар мубориза мебарад.
Паҳлавони дигари тоҷик – Ҷаҳонгир Маҷидов дар рӯзи охири мусобиқа дар вазни -90кг кишвари моро муаррифӣ намуда, барои роҳ ёфтан ба давраҳои дигар талош мекунад. Ҷаҳонгир дар даври аввал бо Петер Сафрани аз Маҷористон рӯи татамӣ мебарояд.
Ғолибону ҷоизадорони мусобиқа дар баробари медал бо ҷоизапулӣ арзишманд қадрдонӣ мегарданд. Ба ғолибон дар ҳамаи вазнҳо 3000-евро, ба барандагони медали нуқра 2000-евро ва ба барандагони медали биринҷӣ 1000-евро тақдим мегардад.
Қаблан хабар дода шуда буд, ки дар баробари Обид Ҷебов ва Ҷаҳонгир Маҷидов Тоҷикистонро – Муҳаммадсолеҳ Қувватов (-60кг), Меҳрзод Суфиев (-60кг) ва Маҳмадшариф Наҷмиддинов (-73кг) намояндагӣ мекунанд. Лекин бо сабабҳои номаълум иштироки ин ҷудокорон дар мусобиқаи Zagreb Grand Prix 2023 сурат нагирифт.