Истифодаи самараноки заминҳои корам, рушди истеҳсолоти кишоварзӣ ва таъмини бозори дохилӣ бо маҳсулоти ватанӣ аз самтҳои муҳими таъмини амнияти озуқавории кишвар ба ҳисоб меравад. Дар ноҳияи Рӯшони Вилояти Мухтори Кӯҳистони Бадахшон низ бо мақсади рушди соҳаи кишоварзӣ, зиёд намудани ҳаҷми истеҳсоли маҳсулот ва истифодаи оқилонаи заминҳои корам тадбирҳои зарурӣ амалӣ карда мешаванд.
Яке аз самтҳои муҳими ин раванд бунёд ва рушди гармхонаҳо мебошад. Гармхонапарварӣ имкон медиҳад, ки дар шароити иқлими кӯҳистон низ истеҳсоли маҳсулоти кишоварзӣ ба роҳ монда шуда, талаботи аҳолӣ ба сабзавоти тару тоза қонеъ гардонида шавад.
Ба гуфтаи Ҳамдам Давлатмамадов, соҳибкори ноҳияи Рӯшон, бунёди гармхонаҳо барои истифодаи самараноки заминҳои корам ва фароҳам овардани шароити мусоид барои истеҳсоли маҳсулоти кишоварзӣ аҳамияти муҳим дорад.
«Ҳадафи асосии бунёди гармхонаҳо истифодаи оқилонаи заминҳои корам, зиёд намудани истеҳсоли маҳсулоти кишоварзӣ ва таъмини бозори дохилӣ бо маҳсулоти ватанӣ мебошад», — иброз дошт Ҳамдам Давлатмамадов.
Ҳамчунин, ба гуфтаи соҳибкор, бо дастуру супоришҳои Пешвои миллат ва дар доираи омодагӣ ба таҷлили 35-солагии Истиқлоли давлатии Ҷумҳурии Тоҷикистон дар ноҳияҳои Вилояти Мухтори Кӯҳистони Бадахшон ба рушди гармхонаҳо таваҷҷуҳи махсус зоҳир гардида, як қатор гармхонаҳо бунёд ва мавриди истифода қарор дода шудаанд.
«Бунёди гармхонаҳо барои рушди соҳаи кишоварзӣ, афзоиши истеҳсоли маҳсулоти ватанӣ ва фароҳам овардани шароити мусоид барои фаъолияти кишоварзон замина мегузорад», — таъкид намуд номбурда.
Дар маҷмӯъ, рушди кишоварзӣ тариқи гармхонаҳо дар ноҳияи Рӯшон ва дигар минтақаҳои вилоят барои баланд бардоштани иқтидори истеҳсолии соҳаи кишоварзӣ, фароҳам овардани ҷойҳои нави корӣ ва коҳиш додани вобастагӣ аз воридоти маҳсулоти кишоварзӣ мусоидат менамояд. Истифодаи мақсадноки заминҳои корам ва густариши фаъолияти гармхонаҳо метавонад дар таъмини амнияти озуқаворӣ ва рушди иқтисодиёти минтақа саҳми назаррас гузорад.
Анисаи Иқболшо