То 1-уми июли соли 2026 шумораи аҳолии Ҷумҳурии Тоҷикистон ба 10 миллиону 817,7 ҳазор нафар расидааст. Тибқи маълумоти Агентии омори назди Президенти Ҷумҳурии Тоҷикистон, ин нишондиҳанда нисбат ба ҳамин давраи соли гузашта 2 фоиз зиёд мебошад. Ҳисобҳои мазкур бо дарназардошти шумораи таваллудшудагон, фавтидагон ва равандҳои муҳоҷирати аҳолӣ анҷом дода шудаанд. Афзоиши шумораи аҳолӣ асосан аз афзоиши табиӣ ва таъсири равандҳои муҳоҷират ташаккул меёбад.
Тақсимоти аҳолӣ дар минтақаҳои кишвар яксон нест. Тибқи маълумоти Агентии омор, вилояти Хатлон аз рӯи шумораи аҳолӣ дар ҷойи аввал қарор дошта, то 1-уми июли соли равон дар ин минтақа 3 миллиону 919,2 ҳазор нафар зиндагӣ мекарданд.
Вилояти Суғд бо 3 миллиону 35,8 ҳазор нафар дар ҷойи дуюм қарор дорад. Дар ноҳияҳои тобеи ҷумҳурӣ 2 миллиону 325,1 ҳазор нафар, дар шаҳри Душанбе 1 миллиону 300,8 ҳазор нафар ва дар Вилояти Мухтори Кӯҳистони Бадахшон 236,8 ҳазор нафар аҳолӣ ба қайд гирифта шудааст.
Афзоиши аҳолӣ ба иқтидори меҳнатӣ ва бозори дохилии кишвар таъсири мусбат расонида, ҳамзамон зарурати рушди инфрасохтори иҷтимоӣ, беҳтар намудани сифати хизматрасонӣ ва истифодаи самараноки захираҳои инсонӣро бештар мекунад.
Ҳамин тариқ, дар давоми як соли охир шумораи аҳолии кишвар 2 фоиз афзуда, тамоюли афзоиши аҳолӣ дар Тоҷикистон идома дорад.