30-юми январи соли 2025 дар кинотеатри ба номи Тоҳир Собиров бо иштироки коргардонҳо, филмноманависон, продюсерон, коршиносони соҳа ва масъулони Муассисаи давлатии «Тоҷикфилм» Питчинг-рӯнамоии лоиҳаҳои синамоӣ баргузор гардид.
Ҳадаф пеш аз ҳама дарёфти филмномаҳо ва истеъдодҳои ҷавон барои тақвияти истеҳсолот ва филмофарӣ дар соли 2025 мебошад.
Ба Питчинг-рӯнамоӣ 10 лоиҳаи синамоӣ пешниход гардида, аз ҷониби муаллифон ва коргардонҳо ба таври аёнӣ (слайд-шоу) муаррифӣ карда шуданд.
Иштирокчиёни чорабинӣ роҷеъ ба лоиҳаҳои синамоии рӯнамоигардида, ибрози андеша карда, баҳри такмилу беҳтар гардидани сатҳу сифати филмномаҳо ба соҳибқаламони ҷавон маслиҳатҳои муфид манзур намуданд.
Лоиҳаҳои муаррифишуда дар муддати 10 рӯзи кории тақвимӣ мавриди баррасию омӯзиши Комиссияи экспертӣ қарор гирифта, лоиҳаҳои ба талаботи филмбардорӣ муносиб интихоб ва ба Шурои бадеӣ пешниҳод мегарданд.
Хотирнишон менамоем, ки баргузории Питчинг-рӯнамоии лоиҳаҳои синамоӣ талаботи замон буда, барои тақвияти фаъолияти эҷодию истеҳсолии Муассисаи давлатии «Тоҷикфилм» ва рушди минбаъдаи синамои ватанӣ зарур арзёбӣ мегардад.
Баргузории Питчинг-рӯйнамоии лоиҳаҳои синамоии навбатӣ 28-уми феврали соли 2025 дар Муассисаи давлатии «Тоҷикфилм» дар назар дошта шудааст.
Ба лоиҳаҳои синамоӣ, ки барои таҳияи филмҳои ҳунарии кутоҳ, тасвирӣ ва мустанад пешниҳод мешаванд, афзалият дода мешавад.
Мехоҳед ба олами филмбардорӣ ворид шаведу ҳунари худро сайқал диҳед, пас лоиҳаҳои худро ба Питчинг пешниҳод намуда, орзуи деринаатонро ҷомаи амал пӯшонед.
Лоиҳаҳои синамоӣ то 27-уми феврали соли 2025 дар Муассисаи давлатии «Тоҷикфилм», кӯчаи Беҳзод, 25 ошёни дуюм, шуъбаи умумӣ қабул карда мешаванд.
Барои маълумоти бештар тавассути почтаи электронӣ ва ё телефонҳои зерин иртибот гирифта метавонед: e-mail: info@tojikfilm.tj Тел: 221-71-50, 93-848-07-50
Маъмурияти «Тоҷикфилм»