Дастаи мунтахаби наврасони Тоҷикистон (U-17) барои медалҳои биринҷии мусобиқоти қаҳрамонии Ассотсиатсияи футболи Осиёи Марказӣ (CAFA)-2024 миёни наврасон, бо дастаи мунтахаби наврасони Эрон (U-17) дидор анҷом медиҳанд.
Шаби гузашта дар бозии ниҳоии гурӯҳи “А” дастаҳои мунтахаби то 17-солаи Тоҷикистон ва Афғонистон дар варзишгоҳи марказии шаҳри Душанбе бо ҳам дидор анҷом доданд. Тақдири вохӯриро як гол ҳал кард, ки он ҳам дар дақиқаи 6-уми дидор аз ҷониби бозингари афғон, Соҳил Сарварӣ ба самар расонида шуд. Ӯ аз зарбаи ҷаримавӣ бо як зарбаи тобнок голи ягонаро вориди дарвозаи тими наврасони тоҷик кард.
Бозии даври сеюм дар гурӯҳи “В” миёни наврасони то 17-солаи Узбекистон ва Эрон сурат гирифта, бо ҳисоби 1 бар 0 ба охир расид. Муаллифи голи ягонаи бозӣ, футболбози ӯзбек, Миразиз Абдукаримов дар дақиқаи 90+4 гардид.
Мавқеи дастаҳо пас аз анҷоми марҳилаи гурӯҳӣ:
Гурӯҳи “А”:
1. Афғонистон – 6 имтиёз
2. Тоҷикистон – 3 имтиёз
3. Қирғизистон – 0 имтиёз
Гурӯҳи “В”
1. Узбекистон – 6 имтиёз
2. Эрон – 3 имтиёз
3. Туркманистон – 0 имтиёз
Ба ҳамин тартиб ғолиби гурӯҳҳо – дастаҳои мунтахаби Афғонистон ва Узбекистон рӯзи 24-уми август дар Варзишгоҳи марказии шаҳри Душанбе бо ҳам барои ба даст овардани медалҳои тиллои мусобиқаи қаҳрамони CAFA-2024 мубориза мебаранд. Бозии финали соати 20:00 шурӯъ мешавад.
Дастаи наврасони Тоҷикистон бошад, барои ба даст овардани ҷойи сеюм бо тими Эрон рақобат мекунад. Ин бозӣ шаби 23-юми август дар Варзишгоҳи марказии Душанбе соати 21:30 оғоз мешавад.
Дар бозии тасаллобахш барои ҷойи панҷум дастаҳои мунтахаби наврасони Қирғизистон ва Туркманистон рақобат мекунанд. Ин бозӣ 23-юми август дар Варзишгоҳи марказии ҷумҳуриявӣ соати 18:00 шурӯъ мешавад.
Рустами Зоир
радиои “Тоҷикистон”
Акс аз саҳифаи расмии ФФТ