Тими футзали Тоҷикистон бо Ӯзбекистон се бозии дӯстона доир намуд

Дар Ҷиззах бозии сеюми дӯстона миёни тимҳои миллии футзали Ӯзбекистон ва Тоҷикистон баргузор гардид.

Вохӯрӣ бо пирӯзии футзалбозони Ӯзбекистон бо ҳисоби калони (5:1) анҷом ёфт. Аз ҳайати тими мо голи ягонаро Идрис Ёров ба самар расонид.

Дар ду бозии қаблии дӯстона дар Ҷиззах дастаҳои мунтахаби Ӯзбекистону Тоҷикистон мусовӣ, бозии аввал бо ҳисоби – 4:4 ва бозии дуюм бо ҳисоби 2:2 ба поён расид.

Барои дастаи мунтахаби футзали Тоҷикистон бозиҳои қаблии дӯстона ба марҳилаи омодагӣ ба қисми ниҳоии Ҷоми Осиё-2022, ки аз 27-сентябр то 8-октябр дар Қувайт баргузор мешавад, таҷрибаи кофӣ хоҳад буд. Дар чемпионати Осиё дастаи кишвар дар гурӯҳи “В” бо дастаҳои Баҳрайн (27-сентябр), Ӯзбекистон (29-сентябр) ва Туркманистон (1-октябр) бозӣ мекунад.