“Истиқлол” имкони ба даври плей-офф баромаданро аз даст дод

Бошгоҳи “Истиқлол”-и Душанбе дар бозии чоруми марҳилаи гурӯҳии Лигаи қаҳрамонҳои КФО-2022, дар гурӯҳи “А” аз қаҳрамони феълии ин мусобиқа, бошгоҳи “Ал-Ҳилол”-и Арабистони Саудӣ бо ҳисоби 0:3 шикаст хӯрд. Дидори дастаҳо дар варзишгоҳи “Шоҳзода Файсал Бин Фаҳд”-и шаҳри Риёз баргузор гардид. Аз ҳайати тими “Ал-Ҳилол” Одион Игало ба номаш дубл кард. Як голи дигарро Салем Ал-Давсарӣ ба самар расонид.

Баъд аз сипарӣ гардидани чор даври мусобиқа “Ал-Ҳилол” дар гурӯҳи “А” бо 12-имтиёз дар садри ҷадвал қарор дорад. Дастаи “Ал-Райян” бошад бо касби 7-имтиёз дар зинаи дуюм ва “Шарҷа” бо 4-имтиёз дар ҷойи сеюм қарор гирифтааст. Бошгоҳи “Истиқлол” бошад то ҳол имтиёзе ба даст наовардааст ва дар тагхонаи ҷадвал ҷой дорад.

Шогирдони Виталий Левченко дар 2-бозии боқимондаи марҳилаи гурӯҳии Лигаи қаҳрамонҳои КФО-2022 бо дастаҳои “Ал-Райян” (23-апрел) ва “Шарҷа” (27-апрел) рақобат мекунанд.

Лигаи қаҳрамонҳои КФО-2022
Гурӯҳи “А”
Даври 4-ум
“Истиқлол” (Тоҷикистон) – “Ал-Ҳилол” (Арабистони Саудӣ) – 0:3

Голҳо: Одион Игало, 8 (0:1). Одион Игало, 33 (0:2). Салем Ал-Давсарӣ, 90+2 (0:3).