Андозбандии амалиёт тавассути ҳамёнҳои электронӣ аз 1 сентябри соли 2026 дар Тоҷикистон пурра ҷорӣ намегардад. Бонки миллии Тоҷикистон хабар медиҳад, ки низоми мазкур аз моҳи сентябр барои муҳлати се моҳ ба таври озмоишӣ фаъол карда мешавад.
Тибқи иттилои Бонки миллӣ, пас аз анҷоми марҳилаи озмоишӣ ва арзёбии омодагии техникии низом, санаи дақиқи мавриди амал қарор гирифтани он муайян карда мешавад.
Низоми нав бо мақсади рақамикунонии ҳисобу китоби андози соҳибкорони инфиродӣ пешбинӣ шудааст. Тибқи маълумоти қаблӣ, баъди ҷорӣ шудани он меъёри андоз барои амалиёти тиҷоративу соҳибкорӣ аз 6 то 3 фоиз коҳиш дода мешавад.
Ҳамзамон, маблағи андоз ба таври худкор ҳисоб гардида, ҳангоми пардохти ғайринақдӣ ба харидор 1 фоиз кешбэк баргардонида мешавад.
Интиқолҳои оддии пул миёни шаҳрвандон, ки ба фаъолияти соҳибкорӣ алоқаманд нестанд, мавриди андозбандӣ қарор намегиранд.
Ҳамин тариқ, оғози марҳилаи озмоишӣ имкон медиҳад, ки фаъолияти техникии низом санҷида шуда, пас аз арзёбии натиҷаҳо муҳлати дақиқи ҷорӣ намудани он муайян карда шавад.