Рӯзи дуюм аст, ки дар қаламрави кишварамон фестивали ҷумҳуриявии “Ҳафтаи китоби кӯдакону наврасони Тоҷикистон” баргузор мешавад. Фестивали мазкур бо иштироки адибону олимон ва адабиётшиносон дар шаҳри Душанбе ва шаҳру ноҳияҳои тобеи ҷумҳурӣ баргузор гардида, ҷамъбасти фестивал рӯзи 16 – уми апрел доир мегардад.
Имрӯз дар МТМУ рақами 16 — и ноҳияи Шоҳмансури шаҳри Душанбе фестивали ҷумҳуриявии “Ҳафтаи китоби кӯдакону наврасони Тоҷикистон” баргузор гардид. Дар фестивал шоирону нависандагон ва аъзоёни узви Иттифоқи нависандагони Тоҷикистон, иштирок намуданд. Дар фестивал кӯдакону наврасон барномаи шеъру адаб омода карда, дар доираи он шеър ва порчаҳо аз достону қиссаҳо хонданд. Ҳамчунин як қисм шеърҳои бачагонаро оҳанг баста, пешниҳоди ҳозирин гардониданд. Шаҳриёр Қаҳҳоров муовини директори МТМУ рақами 16 — и ноҳияи Шоҳмансури шаҳри Душанбе зимни суҳбат ба мо гуфт, ки ҳадаф аз баргузор намудани фестивали ҷумҳуриявии “Ҳафтаи китоби кӯдакону наврасони Тоҷикистон” ошно кардани хонандагони муассиса бо китобҳои тозанашр ва тақвият додани зеҳну малакаи онҳо мебошад.
Дар доираи фестивали ҷумҳуриявии “Ҳафтаи китоби кӯдакону наврасони Тоҷикистон” инчунин хонандагони муассиса саҳначаҳои тарбиявиро ба намоиш гузоштанд ва зери навои мусиқӣ рақсҳои зебо иҷро карданд. Парвина Мусозода хонандаи синфи 6 МТМУ рақами 16 — и ноҳияи Шоҳмансури шаҳри Душанбе мебошад. Ӯ хушҳол аз он аст, ки дар фестивали ҷумҳуриявии “Ҳафтаи китоби кӯдакону наврасони Тоҷикистон” иштирок намуда, бо шоирону нависандагон аз наздик ошно шудаааст.
Маврид ба зикр аст, ки баргузории фестивали ҷумҳуриявии “Ҳафтаи китоби кӯдакону наврасони Тоҷикистон” барои ҷалб намудани насли наврас ба мутолиаи китоб, ташаккул додани малакаҳои хониш, баланд бардоштани сатҳи фарҳанги иттилоотии кӯдакону наврасон ва ба ин васила дар замири онҳо тарбия намудани ҳисси ифтихори миллӣ, ватандӯстиву худогоҳӣ ва гиромидошти арзишҳои милливу умумибашарӣ, мусоидат мекунад.
Сарвинози Сайдалӣ
радиои “Тоҷикистон”