Хабар

Дар Тоҷикистон ба ифтихори ҷашни 5500-солагии Саразми бостонӣ 12 хатсайри нави сайёҳӣ ташкил гардид

PDFПечать

Sarazm 01Дар Тоҷикистон ба ифтихори таҷлили ҷашни 5500-солагии Саразм, ки яке аз ёдгориҳои нодири бостонӣ дар Осиёи Миёна аст, 12 хатсайри нави сайёҳӣ ташкил гардид. Дар ин бора АМИТ «Ховар» бо истинод ба Кумитаи рушди сайёҳии назди Ҳукумати Ҷумҳурии Тоҷикистон хабар медиҳад.

«Дар партави дастгириву ташаббусҳои созандаи Пешвои миллат муҳтарам Эмомалӣ Раҳмон ва тадбирандешиҳои пайваста ҷиҳати ҷалби бештари сайёҳон дар минтақаҳои ҷумҳурӣ хатсайрҳои сайёҳии нав таъсис ёфтанд. Ин хатсайрҳо натиҷаи ҳамкории зичи Кумитаи рушди сайёҳӣ бо шарикони рушд ва ширкатҳои сайёҳии ватанӣ буда, ба муносибати бузургдошти 5500-солагии шаҳри бостонии Саразм, инчунин баҳри тарғиби мавзеъҳои назаррабои мамлакат равона шудаанд», — изҳор доштанд ба мухбири АМИТ «Ховар» дар Кумитаи рушди сайёҳӣ.

Бино ба иттилои масъулини Кумита, аксари хатсайрҳои сайёҳӣ дар заминаи мавзеъҳои таърихию фарҳангӣ ва экологию кӯҳии мамлакат  таҳия гардида, бо назардошти талаботу дархости сайёҳон ва мавсими сайру саёҳат аз 6 то 15 рӯзро дар бар мегиранд.

Аз ҷумла, хатсайре, ки аз ҷониби ширкати сайёҳии ҶДММ “Чил меҳроб” таҳия гардид, аз 8 то 11 рӯзро дар бар гирифта, тавассути шаҳру минтақаҳои Душанбе – Бохтар – Ҳисор – Норак — Ромит – Панҷакент – Истаравшан – Хуҷанд — Душанбе амалӣ мегардад.

Хатсайри дигар аз ҷониби ширкати сайёҳии ҶДММ “Артуч” таҳия гардида, он ба самти сайёҳии кӯҳнавардӣ равона гардидааст ва аз 6 то 8 рӯзро дар бар мегирад.

Sarazm Turism 02

Ҳамин тавр, хатсайри минбаъда аз ҷониби ширкати сайёҳии ҶДММ “Чимтарға Тревел” таҳия гардида, тариқи минтақаҳои Хуҷанд-Панҷакент-Душанбе-Помир то 12 рӯзро ташкил медиҳад. Хатсайри дигар аз ҷониби ширкати сайёҳии ҶДММ “Саёҳати кӯҳҳои Фон” таҳия гардида, тавассути кӯлҳои Тоҷикистон ва кӯҳҳои Фон давоми 12 рӯз амалӣ карда мешавад.

Инчунин аз ҷониби ширкати сайёҳии ҶДММ “Ориент Адвентур” тавассути минтақаҳои Душанбе-Хуҷанд-кӯҳҳои Фон-Ҳафткӯл-Аҷинатеппа-Саразм-Помир, хатсайри шашум ҷип-тур аз тарафи  ширкати сайёҳии ҶДММ “Саёҳати кӯҳҳои Помир” тавассути минтақаҳои Душанбе-Ҳисор-Қалъаи Хумб-Вахон-чашмаи Биби Фотимаи Заҳро-Мурғоб-Қарокӯл аз ҷониби ширкати сайёҳии ҶДММ “Панҷакент интур” тавассути минтақаҳои Душанбе-Искандаркӯл-кӯли Аловуддин-кӯли Мутния-кӯли Калон-кӯли Чуқурак-Панҷакент-Марғгузор-Душанбе, ки 7 рӯзро дар бар мегирад, роҳандозӣ гардиданд.

Sarazm Turism 03

Аз ҷониби ширкати сайёҳии ҶДММ “Саразм 5500” хатсайри дигаре таҳия гардида, давоми 5 рӯз тавассути минтақаҳои Хуҷанд-Истаравшан-Панҷакент-Искандаркӯл-Ҳафткӯл амалӣ карда мешавад. Инчунин аз ҷониби ширкати сайёҳии ҶДММ “Ҳафткӯл” давоми 8 рӯз тавассути минтақаҳои Душанбе — Искандаркӯл — Саразм- Ҳафткӯл — қалъаи Қаҳқаҳа — Хуҷанд, ширкатҳои сайёҳии ҶДММ “Зарафшон” давоми 6 рӯз тавассути минтақаҳои Хуҷанд-Истаравшан-Ҳафткӯл-Искандаркӯл-Душанбе,  ҶДММ “Зарафшон Меҷистик Тревел” давоми 10 рӯз тавассути минтақаҳои Душанбе-Искандаркӯл-Панҷакент-кӯли Марғгузор-Истаравшан-Хуҷанд ва  ҶДММ “Кӯҳандиз” давоми 10 рӯз тавассути минтақаҳои Душанбе-Ҳисор-Бохтар-Вахш-Кӯлоб-Душанбе-Искандаркӯл-Хуҷанд-Истаравшан-Панҷакент-Душанбе хатсайрҳои нав амалӣ карда мешаванд.

 Sarazm Turism 04

 

Маҷмӯи хатсайрҳои мазкур дар шакли буклет бо дастгирии шарикони рушд аз нашр бароварда шуда, аз ҷониби ширкатҳои сайёҳӣ миёни дӯстдорони саёҳати Тоҷикистон ба таври васеъ паҳн карда мешаванд.

Ёдовар мешавем, ки шаҳри бостонии Саразм яке аз ёдгориҳои қадимтарини давраи энеолит ва аввали асри биринҷӣ дар Осиёи Миёна буда, 31 июли соли 2010 Саразм ба Феҳристи мероси фарҳангии умумибашарии ЮНЕСКО дохил шуд.

Манбаъ: АМИТ «Ховар»

 

 

Маҷмӯаи афсонаи мусаввари «Қаҳрамони абадӣ-Темурмалик» дар Кореяи Ҷанубӣ ба табъ расид

PDFПечать

Kitob Temurmalik7 апрел дар доираи Фестивали ҷумҳуриявии «Ҳафтаи китоби кӯдакону наврасон» дар Китобхонаи бачагонаи ҷумҳуриявии ба номи Мирсаид Миршакар маҷмӯаи афсонаи мусаввари «Қаҳрамони абадӣ-Темурмалик»-и нависандаи ҷавон ва рӯзноманигори тоҷик Таҳмина Убайдуллоева муаррифӣ карда мешавад.

Китоби мазкур дар яке аз нашриётҳои бонуфузи Кореяи Ҷанубӣ ба табъ расидааст. Дар ин бора муаллиф ба хабарнигори АМИТ «Ховар» хабар дод.

Ба гуфтаи ин нависандаи ҷавон, маҷмӯаи мазкур аз ҷониби Кумитаи «Санъати афсонагӯӣ»-и Маркази фарҳангии Осиё бо забонҳои русӣ, англисӣ ва кореягӣ бо теъдоди 3000 нусха дар шаҳри Кванҷуи Кореяи Ҷанубӣ ба табъ расидааст.

Маҷмӯа ба хонандагони хурдсол оид ба корнамоиҳои фарзанди далери халқи тоҷик – Темурмалик ҳикоят мекунад. Ороиши китоб аз ҷониби рассоми кореягӣ Ли Мёнай, ки барои тасвири он ба шаҳри Хуҷанд омада, бо таърихи муҳорибаҳои Темурмалик шинос гардида буд, анҷом пазируфтааст.

Гуфта мешавад, ки «Қаҳрамони абадӣ-Темурмалик» дар доираи лоиҳаи ҳамкории фарҳангии Кореяи Ҷанубӣ бо панҷ мамлакати Осиёи Марказӣ бо мақсади рушди санъати афсонагӯӣ ва шинос намудани кӯдакони кишварҳои гуногун бо асарҳои адибони хориҷӣ бо сифати баланд ба нашр расидааст.

Лоиҳаи ҳамкории фарҳангии Кореяи Ҷанубӣ аз соли 2010 инҷониб амалӣ шуда, қаблан дар доираи он китобҳои афсонаи адибони шинохтаи тоҷик, аз қабили  Садри Умар, Азизи Азиз, Гурез Сафар, Раҷабалӣ Қудратов ва Абдуғаффор Абдуҷаббор бо забонҳои тоҷикӣ, русӣ, англисӣ ва кореягӣ ба нашр расидаанд.

«Тавассути афсонаи мазкур кӯдакони кишварҳои гуногунро бо қаҳрамони таърихии халқи тоҷик -Темурмалик шинос кардан мехоҳам. Фикр мекунам, ки бо хондани афсонаи мазкур дар қалби хонандаи хурдсол ҳиссиёти ватандӯстӣ, садоқат ба миллат, шуҷоату далерӣ бедор хоҳад шуд»,- иброз дошт муаллифи китоб Таҳмина Убайдуллоева.

Манбаъ: АМИТ «Ховар»

 

Аз шаҳри Душанбе 5 нафар аъзои Маҷлиси миллии Маҷлиси Олии Ҷумҳурии Тоҷикистон интихоб гардиданд

PDFПечать

Dushanbe Majlisi Milli 01Тибқи муқаррароти қонунгузории амалкунанда, зимни овоздиҳии пинҳонӣ аз ҷониби вакилон – интихобкунандагон номзадии Амонзода Илҳом Темур – ректори Донишгоҳи технологии Тоҷикистон аз ноҳияи Фирдавсӣ, Гулзода Маҳмадшоҳ Қурбоналӣ — ректори Донишгоҳи давлатии тиббии Тоҷикистон аз ноҳияи Шоҳмансур, Раҳмон Дилшод Сафарбек – декани факултети ҳуқуқшиносии Донишгоҳи миллии Тоҷикистон аз ноҳияи Исмоили Сомонӣ, Одилбекова Лола Қиёмбековна – мудири шуъбаи маорифи ноҳияи Исмоили Сомонӣ аз ноҳияи Сино ва Рустами Эмомалӣ – Раиси шаҳри Душанбе, ки аз ҷониби маҷлисҳои вакилони халқи шаҳри Душанбе ва ноҳияҳои он ҳамчун номзад пешниҳод гардидааст, ба узвияти Маҷлиси миллии Маҷлиси Олии Ҷумҳурии Тоҷикистон аз шаҳри Душанбе интихоб гардиданд.

Dushanbe Majlisi Milli 02

Дар ин бора имрӯз дар шаҳри Душанбе зимни ҷаласаи якҷояи мақомоти намояндагии маҳаллии ҳокимияти давлатии шаҳри Душанбе ва ноҳияҳои Фирдавсӣ, Иcмоили Сомонӣ, Шоҳмансур ва Сино, ки оид ба интихоботи аъзои Маҷлиси миллии Маҷлиси Олии Ҷумҳурии Тоҷикистон дар ҳавзаи интихоботии бисёрмандатӣ дар шаҳри Душанбе, №4 баргузор гардид, хабар дода шуд.

Дар интихобот аз 219 нафар вакилони интихобкунандаи маҷлисҳои вакилони халқи шаҳри Душанбе ва ноҳияҳои он 217 нафар ширкат варзиданд. Иҷлосияи маҷлисҳои вакилони халқи шаҳри Душанбе ва ноҳияҳои Фирдавсӣ, И.Сомонӣ, Шоҳмансур ва Сино номзадии панҷ нафар вакилони дар боло зикршударо ба узвияти Маҷлиси миллӣ пешбарӣ намуд.

Бо ҳамин ҷаласаи якҷояи мақомоти намояндагии маҳаллии ҳокимияти давлатии шаҳри Душанбе, ноҳияҳои Фирдавсӣ, И.Сомонӣ, Шоҳмансур ва Сино оид ба интихоботи аъзои Маҷлиси миллии Маҷлиси Олии Ҷумҳурии Тоҷикистон дар ҳавзаи интихоботи бисёрмандатӣ дар шаҳри Душанбе, №4 кори худро анҷом дод.

Манбаъ: АМИТ «Ховар»

 

 
 

НАВРӮЗ – МУЖДАЕ АЗ ОСОРИ КУҲАН. Академик Абдуҷаббор Раҳмонзода дар бораи таърихи пайдоиши ин ҷашни бостонии миллати тоҷик ва эҳёву шукуҳи он дар даврони Истиқлолияти давлатии Тоҷикистон

PDFПечать

Abduchabbor-Rahmonzoda 01Бо зинда шудани табиат дар баҳорон Наврӯз ё Соли нави хуршедӣ фаро мерасад. Наврӯзи хуҷастапай, ки даҳ сол пеш, 19 марти соли 2010 бо ибтикори бевоситаи Пешвои миллат муҳтарам Эмомалӣ Раҳмон тибқи қатъномаи Маҷмаи Умумии СММ   ҷашни байналмилалӣ эълон гардид, чӣ гуна ҷашн аст ва аз рӯи анъанаҳои суннатии мардуми мо бояд ба чӣ тарз таҷлил карда шавад?

 Бо хоҳиши АМИТ «Ховар» ба ин суол Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, доктори илмҳои филология, академик Абдуҷаббор РАҲМОНЗОДА, ки дар бораи ҷашну идҳои суннатии миллати тоҷик рисолаву мақолаҳои зиёде навиштааст, чунин изҳори назар намуд:

— Наврӯз яке аз ҷашнҳои бостонии сарзамини Мовароуннаҳру Хуросони бузург буда, аз давраҳои пайдоишаш то ба имрӯз мақому манзалати худро на танҳо ҳифз намудааст, балки бо шарофати истиқлолият ба он арзишҳои милливу фарҳангӣ ҳамроҳ гардидааст. Тоҷикон, аз давраҳои бостонӣ ба ин ҷашни накӯиву рӯшноӣ эътимоду эътиқод доштанд.

Ҷашни Наврӯз пеш аз ҳама мавсимӣ буда, ба мардуми мо ва халқҳои тамаддуни ҳавзаи Наврӯз аз омадани фасли баҳор ва фаро расидани мавсими кишту кор дарак медиҳад. Аз давраҳои хело қадим тоҷикон ба истиқболи омад-омади Соли нав тайёрӣ медиданд, хонаву кошонаи худро сафед менамуданд, либосҳои нав ба бар мекарданд, шикастпораҳоро аз хона дур месохтанд, оташдону оташкадаҳоро таъмир мекарданд, ҷӯю заҳбурҳоро тоза менамуданд ва бо ин рафтору кирдорҳои шоистаашон сиёҳиро аз хона дуру рӯшноиро дар манзили зисташон ҷой медоданд.

Бо дидани нахустин гулҳои баҳорӣ ва баробаршавии шабу рӯз, ки аз баҳор мужда медод, марди деҳқон тараддуди кишти баҳориро пеш мегирифт.

Дар аҳди бостон маросими зиёде вуҷуд дошт, ки дар онҳо ба Наврӯз арҷи махсус гузошта мешуд. Дар ин рӯзҳо густурдани хони идона, барпо намудани базми наврӯзӣ (бо навохтани оҳангҳои наврӯзии Борбади Марвазӣ), эҳдои ҳадяҳои идона, баргузории мусобиқаҳои паҳлавонӣ ва дигар маросим роиҷ буданд, ки тоҷикон ҳамаи онҳоро бо ихлосмандӣ доир мекарданд. Ҳамин хусусиятҳои Наврӯз, ки аз давраи қадим ҷанбаҳои табиӣ ва халқӣ доштанд, дар «Осор-ул-боқия»-и Абурайҳони Берунӣ ва дигар сарчашмаҳои таърихӣ на танҳо таъкид шудаанд, балки тарзи баргузории онҳо ба таври муфассал нақл гардидаанд.

МУФАССАЛ...

 

Тавсияҳои Кумитаи рушди сайёҳӣ ба ширкатҳои сайёҳии Тоҷикистон оид ба ҷилавгирӣ аз паҳншавии коронавирус

PDFПечать

Kumitai rushdi sayohi 01Кумитаи рушди сайёҳии назди Ҳукумати Ҷумҳурии Тоҷикистон ба ширкатҳои сайёҳӣ тавсия дод, ки то муътадил гардидани вазъият аз ташкили саёҳатҳои ҳам шаҳрвандони дохилӣ ба хориҷи  Тоҷикистон ва ҳам шаҳрвандони кишварҳои дигар аз хориҷ ба Тоҷикистон муваққатан худдорӣ кунанд. Ин тавсия зимни вохӯрии роҳбарияти Кумитаи рушди сайёҳӣ бо роҳбарону намояндагони ширкатҳои сайёҳӣ ва коршиносон пешниҳод гардид.

Дар Кумитаи рушди сайёҳӣ ба мухбири АМИТ «Ховар» гуфтанд, ки  тадбири мазкур  ба хотири эмин нигоҳ доштани шаҳрвандони Тоҷикистон аз бемории коронавирус- COVID-19, ки рӯз ба рӯз дар кишварҳои ҷаҳон доман паҳн мекунад, андешида мешавад.

Дар вохӯрӣ коршиносон низ оид ба омилҳои пешгирии сироятёбӣ аз ин вирус якчанд маслиҳатҳо пешниҳод намуданд. Ширкатҳои сайёҳии ватанӣ дар навбати худ оид ба тақвияти рушди сайёҳии дохилӣ пешниҳодҳои мушаххас карданд.

Ин дар ҳолест, ки Созмони умумиҷаҳонии сайёҳӣ (СУС), ки як ниҳоди бонуфузи байналмилалии соҳавӣ маҳсуб меёбад, мавқеи Созмонро оид ба кафолат ва дастгирӣ аз хатарҳои коронавирус COVID-19 баён дошт.

МУФАССАЛ...

 
 

Саҳифаи 1 аз 101

Back to Top